 |
ဒု-ဥက္ကဌ ဗော်သၟာဍုင်မန်တၟိ
နာဲရဿဝွံ မဒှ်ကောန်ဗၠာဲ နာဲမိုၚ်ၚ် မိဖဲစိၚ်တအ်တုဲ ပ္ဍဲသက္ကရာဇ်ဍုၚ် (၁၃၀၈) ဂိတုကထိုန် (၈) မံက် (၁– ၁၁– ၁၉၄၆) တ္ၚဲသိုက်ဂှ် ကတဵုဒှ်မၞိဟ် ပ္ဍဲကွာန်ကၠအ်သတ် ပွိုၚ်ဍုၚ်မုဟ်ဍုၚ် တွဵုရးဍုၚ်မန်ရ။ ပ္ဍဲကောဒေံနွံ (၅) တၠဂှ် ဒှ်ကောန်ဗၠာဲ လၟေၚ်စတုတ္ထရ။ ယၟုနူဍောတ်တ်တေံဂှ် မာံသိုဲယေန် ကော်ကၠုၚ်ဒၟံၚ်တုဲ အခါစိုပ်ကၠုၚ်တိဍာ်ပၠန်ဂတးဂှ် ပြံၚ်သၠာဲတၚ်ယၟုတၟိ နာဲရဿ ရ။
နူတန်မူလ ဒဵုကဵုစိုပ်တန်သတ္တမဂှ် ဗ္တောန်ကၠုၚ်ပညာ ပ္ဍဲဘာတန်လဒေါဝ် ကွာန်ကၠအ်သတ်တုဲ တန်အဋ္ဌမ ကေုာံ တန်နဝမ တအ်ဂှ် ကတ်ဗ္တောန်ကၠုၚ်လဝ် ပ္ဍဲဘာတန်သၠုၚ် စၟတ် (၁) ဍုၚ်မုဟ်ဍုၚ်တုဲ ပ္ဍဲသၞာံပထမဂှ််ဟေၚ် အံၚ်ကၠုၚ်န ကဵုဂုဏ်တၟေၚ်ရ။ ကြဴဂှ် ဆက်တိုန်ဘာ တက္ကသိုလ်ပရေၚ်ပိုန်ဒြပ် ပ္ဍဲဍုၚ်လ္ဂုၚ်တုဲ အံၚ်ဇၞးဂွံကၠုၚ်တဆိပ်ကြာ ( B.Com) ကေုာံ R.A ရ၊ ဘာတုဲဂှ် ကၠောန်ကၠုၚ်ကမၠောန် အပ္ဍဲ(က-ပ-စ) ပွိုၚ်ၜါသၞာံရ၊ အခိၚ်တိုန်မံဘာတက္ကသိုလ်ပရေၚ်ပိုန်ဒြပ် ပ္ဍဲသၞာံ (၁၉၆၆-၆၇) ပွိုၚ်ၜါသၞာံဂှ် ကေတ်ကၠုၚ်တာလျိုၚ် ညးအုပ်ကာနာနာ ပ္ဍဲဂကောံလိက်ပတ်ယေန်သၞာၚ်မန် တက္ကသိုလ်လ္ဂုၚ်ရ။
၁၉၇၁ ဂိတုဨဗြဳ (၃၀) ဂှ် သီုကဵုသ္ကအ်ရဲလ္ၚဵု စိုပ်ကၠုၚ်ဗော်ဍုၚ်မန်တၟိ သွက်ဂွံယိုက်ဂၠေၚ် ပရေၚ်ဗၠးၜးဂကူမန်ရ၊ ၁၉၇၁ ပ္ဍဲသ္ဘၚ်သဳကၠဳက္ဍိုက်က္ဍိုပ်ဗဟဵုဂှ် ဒှ်ကၠုၚ်ကမ္မတဳဗဟဵုတုဲ (၁၉၇၃) ဂှ် ဒှ်ကၠုၚ်ကမ္မတဳရေၚ်တၠုၚ် ကေၚ်ကာဗဟဵုရ၊ ပ္ဍဲသၞာံ (၁၉၈၁) အခါဗော်ဍုၚ်မန်တၟိ ဒှ်အာၜါကရေက်ဂှ် ဗက်အာလပါ်ဂကောံ ဥက္ကဌ နာဲယှိုဲကျေန် (ဝၚ်က) တုဲ ဒှ်ကၠုၚ် ညးအုပ်ကာ နာနာဗဟဵုရ။ ပ္ဍဲသၞာံ (၁၉၈၇) အခါကၠောန်သ္ဘၚ်သဳကၠဳဗော် အလန်ပထမဂှ် ညးဂမၠိုၚ်ရုဲစှ် ဒှ်ကၠုၚ်ညးအုပ်ကာဗဟဵုတုဲ၊ ဒဵုသၞာံ (၂၀၀၃) မံက်ဂှ် ယိုက်ဂၠေၚ်ကၠုၚ်ရ၊ ပ္ဍဲသၞာံ (၂၀၀၃) ဂိတုဨဗြဳဂှ်ညးဂမၠိုၚ်ရုဲစှ် ဒှ်ကၠုၚ်ဒု-ဥက္ကဌ ဗဟဵု စၟတ်(၂) တုဲ ပ္ဍဲသၞာံ (၂၀၀၆) ဂှ် ဒှ်ကၠုၚ်ဒု-ဥက္ကဌဗဟဵု ဒဵုကဵုစုတိ ကလိလောန်အာ ယိုက်ဂၠေၚ်ကၠုၚ်လဝ်တာလျိုၚ်ရ။
အခိၚ်ယိုက်ဂၠေၚ်မံၚ်တာလျိုၚ် ပ္ဍဲဗော်ဍုၚ်မန်တၟိဂှ် ကုမၞိဟ်တာလျိုၚ်က္ဆံၚ်လ္တူကီု က္ဆံၚ်သၟဝ်ကီု ပြေပြေပြံၚ်ၚ်ဆက် ဆောံလေပ်၊ လ္တူညးဍုၚ်ကွာန်တံလေဝ် ဓဝ်ဂါရဝနွံနွံ ဆက်ဆောံဆောံကၠုၚ်ဗွဲမပြေပြံၚ် ကလိတ်ကလောတ်တုဲ ဟွံကေတ်အခေါၚ်တၟေၚ် အတိုၚ်လၟေၚ် ပွသၟာပၠန်ဂတးခိုဟ်မွဲ ဒ္ဂေတ်ဗက်မၚ်မွဲကၠုၚ်ရ။ လိက်ပတ်စပ်ကဵုသဘဴဓဝ်ပရေၚ် ဍုၚ်ကွာန်တအ်ဂှ် ကတ်လ္ၚတ်ဂၠိုၚ်တုဲ နကဵုဘာသာမန်ကီု၊ ဘာသာဗၟာကီု ချူဇန်လိက် ကဗျ၊ လိက်ပရေၚ်၊ လိက်လလောၚ်တြးတအ် ကေက်သ္ကာစိုပ်တရဴဂၠိုၚ်ရ၊ အပ္ဍဲဂျာနေဝ် ဗော်ဍုၚ်မန်တၟိဂှ် နကဵုယၟုကၞေဟ် မေန်သိုဲယေန်၊ မေန်သိုဲၚေဝ်၊ မေန်န်ၚေဝ်၊ သ္ဂံၚ်ရဿ၊ သ္ဂံၚ်တၞာၚ်ရတ်တအ် စကာကၠုၚ်မံၚ်ရ။
ဟိုတ်နူကတ်လ္ၚတ်လဝ် သဘဴဓဝ်ပရေၚ်ဍုၚ်ကွာန် ဂၠိုၚ်လောန်တုဲ၊ ကေတ်တာလျိုၚ်သ္ပကၠုၚ်အ္စာ ပ္ဍဲဘာပရေၚ်ဍုၚ် ကွာန် ဂၠိုၚ်ကဵုဝါရ။ ဂလာန်တၟေၚ်ညးဟီုကၠုၚ်လဝ် ပြာတတ်မံၚ် မွဲသာ်ဝွံ ၚုဟ်မးသၟာပၠန်ဂတးတအ်ဂှ် “တန်တဴမံၚ် ပ္ဍဲၜိုတ်လဵုဒုၚ်ဂိသွက်ပၠန်ဂတး ၜိုတ်လဵုသၠးဂုဏ်ဖဵုဇကု ၜိုတ်လဵုဒတူလိုၚ်ဗိုန်ခိုၚ်တအ်ဂှ်ရ” ဗဂလာန်ညးဟီုကၠုၚ်လဝ်ဂှ်ဟေၚ် ညးမၚ်မွဲဒုၚ်ကေတ်တုဲ ကၠောန်သ္ပကၠုၚ်မံၚ်ရ၊ သဘာဝဗဳဇညးဂှ် စိုတ်ခိုဟ်၊ စရိုတ်ခိုဟ် မံၚ်ၜိုဟ်ဟ်လေပ်တုဲ ပ္ဍဲပရေၚ်ဂဳတ သုခုမလေဝ် ဝါသနာထတ်ရ။
ပ္ဍဲသၞာံ (၂၀၁၃) မံက်ဂှ် ဒှ်ကၠုၚ်ယဲကေန်သာ ဂၠံၚ်ထိုၚ်စၞတုဲ အာလွဳလဝ် ပ္ဍဲရုၚ်ဂဥုဲ ဍုၚ်က္ၜၚ်ကံက်ရ၊ ၜိုန်ဂှ်လေဝ်ဟွံဗၠးတုဲ ပ္ဍဲဂိတုဂျောန် စၟတ်တ္ၚဲ (၁၅) အခိၚ်ဗ္တံ(၈) နာဍဳ (၂၃) မိနေတ် (အခိၚ် ဍုၚ်သေံ) ဂှ် ပူဇဴဏာလမျီုသွက်ဍုၚ်ရာမည ပ္ဍဲရုၚ်ဂဥုဲ ဍုၚ်သၚ်ခလၜူရဳ(ဝၚ်က) ရ။
ပ္ဍဲအယုက် (၆၇) အခါညးစုတိ ကလိလောန်စဴအာဂှ် ကဝံၚ်ညး မိတၞာၚ်ဗၠဲ ကောန်ဝုတ်ညး မိအံၚ်ရေၚ်၊ မိအံၚ်ပိုန်၊ မိနန်ရတ်၊ မိစမ္ပာရတ် ကေုာံ ကောန်ဗၠာဲ မာံပိုၚ်ရတ်တအ် သှ်ေတဴဒၟံၚ်ရ။
နိဿဲ
>>တၞးလိက်Pamphlet<<
0 comments:
Post a Comment
ဗှ်တုဲချူစွံလဝ်မွဲမွဲသာ်ဏး