 |
သၟာပရေင်ဍုင်ကွာန်မန်
အ္စာနာဲဖဵုစိၚ် (က) နာဲမၞိက်ရတ်ဝွံ ပ္ဍဲကဵုသက္ကရာဇ် (၁၂၆၈) သၞာံ ဂိတုခ္ဍဲသဳ (၁၀)စွေက် တ္ၚဲအၚာ သၠးနူဂဝ်မိရ၊ ဌာန်ဇာတိတၟုပ်သုက်ဂှ် ဒှ်ပွိုၚ်ဍုၚ်မုဟ်ဍုၚ် ၊ ကွာန်ကၟာဝက်တုဲ မိမညးၜါဂှ် ဒှ်နာဲဖခိလ် ကေုာံ မိဣနှေၚ်တအ်ရ၊ စဗ္တောန်လိက်ပတမန်၊ လိက်ဗၟာ နူကၟာဝက်တုဲ ကာလတိုန်ဘာတန်သမၠုၚ်ဂှ် အာတိုန်ဗာကောန်ဂကူ ကော်ဂး (တိုၚ်ရၚ်းအထက်တန်းကျောၚ်း) ပ္ဍဲကွာန်ကျာ်ရဲ ပွိုၚ်ဍုၚ်မုဟ်ဍုၚ် ဇရေၚ်ကျာ်ဇၞော်အစာပညါဒိဗ္ဗတုဲ အံၚ်အာစှ်တန်ပ္ဍဲဘာဂှ်ရ၊ နူဂှ် ဆက်တိုန် ဘာပကတ်ပကေၚ်အ္စာဘာ ပ္ဍဲဍုၚ်မတ်မလီု အရာပ်သၟိၚ်ၚိုန် (မိုၚ်ၚါန်) ဇရေၚ်ကျာ်ဇၞော်ဘာဝါ (ကွေၚ်ကျံၚ်) တုဲ မွဲကဆံၚ် တိုန်ဘာနဝ်မာန်၊ ဍုၚ်မတ်မလီုတုဲ အာၚ်ဇၞးကေတ် ဘာပကတ်ပကေၚ်အ္စာဘာရ၊ အံၚ်ဇၞးအာ နဒဒှ်အ္စာဘာတုဲ သ္ပအ္စါဘာတန်လဒေါဝ် ပ္ဍဲကွာန်ကၟာဝက် မဒှ်ဌာန်တၟုပ်သုက်ရ၊ အပ္ဍဲအခိၚ်ပ မံၚ်အ္စာဘာဂှ်ရ ဒက်မိတ်ဒာန်ကုမိဌေယေန်တုဲ စှ်ေအာဒၞဲါဝဲါ ကလိဂွံကောန်တြုံပန်၊ကောန်ဗြဴပန်ရ၊ ကောန်တြုံမွဲ ကဵု ကောန်ဗြဴမွဲဂှ် ချိုတ်အာနူဍောတ်တ်ရ၊ ညံၚ်ဗီုဂလာန်မန် မဟီုစ “ကဒါတ်ဗက်ဗျ ကောန်ဗက်မိမ“ ကီု ဟိုတ်နူညးဗတောန်ဖျောန်ထ္ၜးဂၠံၚ်ခိုဟ်တုဲ ကောန်ဇာတ်ကောန်စဴညးဗွဲမဂၠိုၚ်တံဂှ် ပ္ဍဲအရာပညာကီု ပ္ဍဲအရာစိုတ်ဓါတ်ဆာန်ဂကူကီု ပေၚ်တၟိုဟ်ဒၟံၚ်သီုဖအိုတ်တုဲ ယိုက်ဂၠေၚ်ဒၟံၚ် အဇိုၚ်(တာလျိုၚ်) ကောန်ဂကူပ္ဍဲဂကောံမန်ဂမၠိုၚ် မပ္တံ ဂကောံဒဳမဝ်ကရေသဳကောန်ဂကူမန်၊ ဂကောံဗတောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ကေုာံ ဂကောံနာနာ ဒၞဲါညးတအ်မစိုပ်ဂှ်အိုတ်ရ၊
ပ္ဍဲခေတ်ပၞာန်ဂၠးတိအလန်ဒုတိယတုဲ အခိၚ်မန်ဗၟာဂ္စာန်ဒၟံၚ် ညးၚ်ဍုၚ်မန်ဗၟာဂွံသၠးပွးနူအၚ်ကလိက်ဂှ် ပံၚ်တောဲ ကုအ္စာဖဝ်ချိုဝ်တုဲ ယိုက်ဂၠေၚ်ကၠုၚ် ကမၠောန်ဍုၚ် ကမၠောန်ဂကူကီုရ၊ ဗွဲကြဴ ကာလမန်တအ် ညာတ်ကေတ် ယဝ်ရမန်ဟွံကၠောန်ပရေၚ်ဍုၚ်ကွာန်တၞဟ်ပြာမ္ဂးတှ်ေ အခေါၚ်ပရေၚ်ဍုၚ်ကွာန်ဂှ် မန်တအ်ကလိဂွံဟွံမာန်တုဲ ဒက်ပတန်ကၠုၚ် ဗော်မန်ကောန်ဍုၚ်အရၚ်ဂှ် နဒဒှ်ကေၚ်ကာဗဟဵုမွဲတၠဂှ် ညးယိုက်ဂၠေၚ်ကၠုၚ် ကတိုၚ်ကတိုၚ်ကၟဟ်ဟ်ရ၊ က္ဍိုပ်သ္ကိုပ်မန်(၇)တၠ နွံတမ်ဇိုၚ်ဇၞော်ကုသလ (ဝါဍောတ်) ၊ အ္စာဖဝ်ချိုဝ်၊ နာဲဖဝ်စိၚ် (ကၟဝက်)၊ နာဲထဝ်အး (ကၟာဝက်)၊ နာဲပျုၚ် (ကၟာဝက်)၊ နာဲဆာန်မန် (ကၟာဝက်)၊ နာဲဖဝ်အံၚ်(ဝါဍောတ်)၊ တအ် ပကောံဓရီု ပ္ဍဲသၞာံ ၁၃၀၈ ပ္ဍဲကွာန်ဝါဍောတ် (တကအ်ခၟိုၚ်)တုဲ ဂၠဲါသွဟ်ဂၠဲါဂၠံၚ် ဗီုလဵုကၠောန် ဗီုလဵုပမ္ဂး စိုတ်ဓါတ်ဂကူမန်တအ် ဂွံကတိုၚ်ကၟဟ်ကၠုၚ် ပ္ဍဲပရေၚ်ကောန်ဂကူရောဂှ် ချပ်ရေၚ်သ္ကအ်အိုတ်ရ၊ ပ္ဍဲဂှ် ညးတအ်ညာတ်ကေတ် ပ္ဍဲဂကူမန်ပိုဲ သဘၚ်ကၞာမစိုပ်ကဵုပြဝေဏဳတအ် ၜိုန်ရနွံကၠုၚ် ဇၟာပ်ဂိတုကီုလေဝ် သဘၚ်ကၞာမစပ်ကဵု ပရေၚ်ကောန်ဂကူဇေတ်တ်ဂှ် ဟွံမွဲတုဲ တ္ၚဲကောန်ဂကူမန်မွဲ ပိုဲတအ် သ္ဒးဗမံက်ပတိုန်ထေက်ရောၚ် စှ်ေစိုတ်တုဲ ဂၠာဲတ္ၚဲသွက်ဂွံခုတ်ပတန် တ္ၚဲကောန်ဂကူမန်ရ။ ပ္ဍဲဂှ် နာဲထဝ်အး ပတိုန်ထ္ၜး ပတၟေၚ်ကဵု တ္ၚဲဂကူမန်တအ် မပတန်လဝ်ဍုၚ်ဟံသာဝတဳ ပ္ဍဲဂိတုမာ်မွဲစွေက်ဂှ်တုဲ တ္ၚဲမာ်မွဲစွေက်ဂှ် ဒးစၟတ်သမ္တီ တ္ၚဲကောန်ဂကူမန်ထေက်ရောၚ်၊ တုဲပၠန် အပ္ဍဲအခိၚ်ဂှ်မ္ဂး ဒှ်အခိၚ်မန်တအ် ဝါဗ္ၚတုဲ ဒှ်အခိၚ်သၠး ရာသီဥတုလေဝ်သာယျာတုဲ ညးဂမၠိုၚ်တုပ်စိုတ် ဖျေံသ္ဂုတ်သွာတ် တ္ၚဲမာ်မွဲစွေက်ဂှ် ညံၚ်ဂွံစၟတ်သမ္တီ နဒဒှ်တ္ၚဲကောန်ဂကူမန်ရ၊ ဗွဲကြဴ တၞဟ်နဂွံဒှ် ဆန္ဒအလုံကောန်ဂကူတုဲ ကာလကၠောန်သဘၚ်ကောံဓရီုကောန်ဂကူအလန်ကၠာအိုတ် ပ္ဍဲကွာန်ပ္ၚဂှ် ကလေၚ်ဖျေံသ္ဂုတ်သွာတ် ပဒတန်ပၠန်ရ၊၊ ဍုၚ်ဗၟာဂှ် ဂွံသၠးပွးတုဲ ဂကူမန်ဂှ် အခေါၚ်သၠးပွးညိဟွံမွဲ သွက်အခေါၚ်မန် ဂွံမံက်ဂတဝ်တိုန် မာန်ဂှ် သ္ဒးသၠိုန်ပတိုန် ကဆံၚ်ပရေၚ်ချဳဓရာၚ်ကောန်ဂကူရောၚ်၊ က္ဍိုပ်သ္ကိုပ်မန်တအ် ဖျေံသ္ဂုတ်သွာတ်တုဲ တၞဟ်နကလိဂွံဇြဟတ်အရီုဗၚ် နူမန်ဍုၚ်သေံတုဲ ပ္ဍဲသၞာံ ၁၃၁၀ ဂိတုပထမ ဒဂိုန်(၂)မံက် (၇၊၆၊၄၈)ဂှ် ညးတံညးပန်တၠ အစာဖိုလ်ချိုဝ်၊ အစာဖိုဝ်စိၚ်၊ နာဲအိုၚ်ထောန်၊ နာဲသာန်လှာၚ် တိတ်အာဆက်မိတ် ကုကောန်ဂကူမန်ဍုၚ်သေံရ၊၊
ပ္ဍဲအခိၚ်မန်တအ် မစေှ် စိုတ် ဒြဟတ်လွဟ်ဟွံမွဲမ္ဂး ဗၟာဟွံဖေက်မန်တုဲ စန်ဒက်သၟတ်တံတုဲ သွက်ဂွံဗတောန်ကဵု ကွတ်ပၞာန်ဂှ်လေဝ် ကေတ်တာလျိုၚ်စန်ဒက်ကၠုၚ် သၟတ်မန်ပ္ဍဲဒေသမုဟ်ဍုၚ်တအ်ပေၚ်ၚ်ကီုရ။ ဒပ်ပၞာန်ဗၟာတံဗက်ဂၠဲါရပ် ညးမချဳဓရာၚ် ပ္ဍဲဂကောံသၟတ်တံတုဲ စံၚ်ထောံကွာန်ကၟာဝက် ပ္ဍဲသၞာံ ၁၃၁၀ ဂိတုဖဝ်ရဂိုန် (၃)မံက်ဂှ် သ္ၚိနာဲဖဝ်စိၚ်တံကီု သီုကဵုသ္ၚိနာဲထဝ်အးတအ်လေဝ် တူအာပၟတ်ကရောမ်ဂှ် သီုဖအိုတ်ရ။
ဗွဲကြဴ ကာလမန်တိတ်ပၠန်ဂတးမရပ်လွဟ်ဂှ် ဗက်တိတ်အာက်ုတုဲ ကာလမန်ရဲလွပ်လွဟ်တအ်သီုဖအိုတ် ဒက်ပ္တန်ပ္တိုန်မွဲဗော် ကော်ဂး ဗော်ပၠတရဴဍုၚ်မန်ဂှ် နာဲအံၚ်ထောန်ဂှ် ဗွဲကိုပ်ကၠာဂွံဒုၚ်ရုဲစှ် ဥက္ကဌတုဲ ညးအုပ်ကာနာနာဂှ် နာဲဆာန်မန် ၊ ကေုာံ အစာဖိုဝ်စိၚ်၊ နာဲနလ္လာ၊ နာဲစိၚ်ထောန်၊ နာဲဖိုဝ်ကံၚ်၊ နာဲထောန်သိၚ်၊ နာဲၚိုဲတုၚ်၊ နာဲတုၚ်မောၚ်၊နာဲယှိုဲကျေန်၊ နာဲထောန်ခေန်၊ နာဲသာဟာန်တအ်ဂှ် နဒဒှ်ညးကေၚ်ကာဗဟဵုဂှ် ရုဲစှ်ခပတိုန်လဝ်အိုတ်ရ။
လုကဴပွိုၚ်စှ်သၞာံစှ်ဗြဲ လုပ်ပေဲါဗတိုက်တုဲ ကာလဗော်ပၠတရဴဍုၚ်မန် လှာဲလွဟ်နကဵုဒဳမဝ်ကရေသဳဂှ် ပါလုပ်ကၠုၚ်ကီုရ၊ \n" +
"ပ္ဍဲကာလဗော်ပၠတရဴဍုၚ်မန် ကလေၚ်ရုဲစှ်ညးတာလျိုၚ်တၟိ ပ္ဍဲသဘၚ်ကောံဓရီုဇၞော် ပ္ဍဲမတ်မလီုဂှ် နာဲအံၚ်ထောန်ဂှ် နဒဒှ်ဥက္ကဌ ၊ အစာနာဲဖိုဝ်စိၚ်ဂှ် နဒဒှ်ဒုဥက္ကဌ၊ နာဲထောန်သိၚ်ဂှ် နဒဒှ်ညးအုပ်ကာနာနာ ကေုာံ နာဲတုၚ်မောၚ်ဂှ် နဒဒှ် ဒုညးအုပ်ကာနာနာ မြၝသာ်ဝွံ ကလေၚ်ဒက်ပ္တန်ဗော်တၟိရ။
ပ္ဍဲသဘၚ်ရုဲမာဲသၞာံ ၁၃၂၁ ဂိတုမာ်(၁၀)မံက်ဂှ် ညးဒုၚ်ရုဲမာဲ ပ္ဍဲဒေသပွိုၚ်ဍုၚ်မုဟ်ဍုၚ်ဂှ် ကလိဂွံဇမၞး ဂွံဒှ်အမာတ်မန်တုဲ ပၞောဝ်ကဵုအမာတ်မန်ကၠာအိုတ် ပန်တၠဂှ် ညးလေဝ် ဒှ်အမာတ်မွဲကီုရ။ နကဵုလညာတ်ညးမ္ဂး မန်တမၠာတအ်ဂှ် ဗိုက်ဗံၚ်မဳတုဲ ကာလတိုန်ပါလဳမာန်ဂှ် တိုန်နကဵုကယျိုၚ်ဗံၚ်မဳဇမၠိၚ် (ဂွဟၚ်)၊ လတက်ပလောအ်တဲဇမၠိၚ်ဩိုဟ်ပါ်၊ စွံသော်ဒတ်လတက်တွဵုက်ုလေဝ် ဆ္ဂးဗွဲကြဴ မန်တအ်စၟတ်သမ္တီကၠေံ ကယျိုၚ်ကယျဝ်မန် နကဵုဂၠိက်အသာ်ဗကေတ် ကၞၚ်ဗု ပလောအ်ဗု ကၞၚ်ဗကေတ်တုဲ ၜိုန်ရဟွံကိတ်ကဵုကဵု လညာတ်ဇကုကီုလေဝ် ရန်ကဵုသၟဟ်န်ဂကူတုဲ ဗိုက်လတက်ဗက် အတိုၚ်ဗီုညးတၞဟ်ကီုရ။
ဗွဲကြဴဂကောံမန်ဂမၠိုၚ် ပံၚ်ကောံတုဲ ဒက်ပ္တန်ပ္တိုန် ကမ္မတဳမဗမံက်ပ္တိုန်တွဵုရးဍုၚ်မန် (မွန်ပြည်နယ် ဖော်ထုတ်ရေး အလုပ်ညီညွတ်ရေးကော်မတီ) ဂှ် နာယကဂှ် ရုဲစှ်ပတိုန်တၠဳပိုန် ပိဇကုတုဲ သၟေဟ်တံဂှ် ရုဲစှ် ဗဟဵုကမ္မတဳဂှ် အစာဖိုဝ်စိၚ်လေဝ်ပါ လုပ်လဝ်မွဲတၠက်ုရ၊
ပ္ဍဲကာလမဒက်ပ္တန် ကမ္မတဳဗမံက်ပတိုန်တွဵုရးဍုၚ်မန်ဂှ်လေဝ် နဒဒှ်ဂကောံကမ္မတဳမွဲဂှ် ပါလုပ်လဝ်ကီုရ၊ အဃောမဂ္စာန်ကၠောန်ဒၟံၚ် သွက်ဗၠးၜးတွဵုရးဍုၚ်မန်ဂွံမံက်ဂှ် ပ္ဍဲသၞာံ ၁၃၂၃ ဂိတုမာ် (၁၀)စွေက် (၁၉၆၂၊ မာတ် ၂)ဂှ် တၠအဝဵုပၞာန်သီထောံအဝဵုဍုၚ်တုဲ ပရေၚ်ကမၠောန် ညးတံသီုဖအိုတ် ကၠေံအိုတ်အာ သၟဝ်ပၠံၚ်သေနာတ်နေဝေန်ဖအိုတ်ရ။
ပ္ဍဲသၟဝ်သၞောတ်တၠအဝဵုပၞာန်ဂှ် အခေါၚ်ကၠောန်ပရေၚ်ဍုၚ်ကွာန်ဟွံမွဲကီုလေဝ် ကမၠောန်ပရေၚ်ကောန်ဂကူ မကၠောန်ဂွံတအ် မပ္တံကဵုဗ္တောန်လိက်မန်၊ ချူလိက်ပရေၚ်၊ တ္ၚဲကောန်ဂကူမန်၊ ကေုာံ ပရေၚ်ဂကောံမန်တအ်ဂှ် ပါလုပ်က္ဍိုက်ကၠုၚ်က္ဍိုပ်ပေၚ်ၚ် စဵုကဵုဇုတ်မစိုပ်တိရ၊ ပ္ဍဲသၞာံ ၂၀၀၁ ဂှ် ကောန်ဂကူမန်ဂၠိုၚ်ကဵုဒေသ မွဲဟာန်ကေုာံဗော်ဍုၚ်မန်တၟိတအ်ဂှ် မိက်ဂွံရော်ဂုန်ဆာပ်ဂုန် လ္တူညးတုဲ ကၠောန်သ္ဘၚ် ပတိုန်ဂုန်စရာဲ ပ္ဍဲဍုၚ်မတ်မလီု ပ္ဍဲသ္ဘၚ်ကၞာ တ္ၚဲကောန်ဂကူမန် ကေုာံ ပ္ဍ္ဍဲသ္ၚိညး နကဵုယၟု “ က္ဍိုပ်သ္ကိုပ်ကောန်ဂကူမန် အစာဖိုဝ်စိၚ်ရ“ ။
ယဝ်ရဒးချူဗီုဒ္ဂေတ်ပြဝညးမ္ဂး ညးဝွံစၞၜူမာဲတအ်ဂှ် ဝေၚ်ပါဲလဝ်ပေၚ်ၚ်တုဲ ၜံက်ဇမၠုတအ်ဂှ်လေဝ် ဟွံစသုၚ်ရ၊ စပ်ကဵုဇဗၠုတုဲ ညးချူလဝ် ပ္ဍဲလိက်ပရေၚ်မွဲ “ဇဗၠုဆတ်ဂၞဴ စတဴပိုန်အောန်” (ဂတာပ်ခေတ် ကၞပ်ပိ)မ္ဂး ဒဒှ်ဇဗၠုဝွံ ရံၚ်ကဵုပရေၚ်ထတ်ယုက်ကီု၊ ရံၚ်နကဵုပရေၚ်ပိုန်ဒြပ်ကီု၊ ရံၚ်နကဵုပရေၚ်ကျာ်ဩဳမၞိဟ်ကီု၊ ဆမွဲဒၞဲါကီု လ္ပာ်ခိုဟ်ဟွံမွဲဂှ်ရ၊ ကောန်ၚာ်သၟတ်ကွးဘာဂမၠိုၚ် ကဵုသၟတ်ဝုတ်ဗၠာဲတအ်ဂှ် ဂတနူဏံမတ်တၟ ၃၂ ဍုၚ် ၊ဗဂေါ ၃၂ ဍုၚ်၊ ဖါသီ ၃၂ဍုၚ်၊ မၞိဟ်တဲသၠုၚ်ၚ်ဏအ်ဟေၚ်ဂွံမၚ်မွဲပကၚ်ရၚ်အာရောၚ်။ ဟိုတ်ဂှ်ရ သွက်ဂွံပ္တန်အာဍုၚ်မန် အနာဂတ်ဂတ ကျေဝ်ကျေဝ်ဆာဲဆာဲ ဂွံဒှ်စရာဲကျာ်ဩဳဂကူမန်ဂမၠိုၚ်ကီု၊ သီုကဵုပညာဂတာပ်ခေတ် ကေုာံ ပိုန်ဟာန်ဒြပ်ရတ်ဂမၠိုၚ် ဂွံတန်တဴအာ ဗွဲမခိုၚ်ကၠိုက်ဗိုန်ဇၟအ််ဂှ် လ္ပစသတ်အိုတ်ညိ။ ရဴသာ်ဝွံ ဂွံဆဵုကေတ် ပ္ဍဲလိက်ပရေၚ်ညးရ။ အခိၚ်ကာလအယုက်ဇၞော်ဝွံလေဝ် ညးမွဲမွဲကၠုၚ်ကလအ်စညးမ္ဂး ကာလညးရာဒနာမ္ဂး ဒဒှ်ရ မတ်တၟ ၃၂ ဍုၚ်၊ ဗဂေါဟံသာ ၃၂ ဍုၚ်၊ ဖါသီ ၃၂၊ တအ်ဂှ် ကောန်မန်တအ် ကဵုဂွံကလေၚ်ပ္တန်ပကၚ်ရၚ်အာညိဂှ် ညးဟီုတွဵုရ၊ ရံၚ်ကေတ်လတူဂလာန်ညးဝွံတုဲ ၜိုတ်လဵုစိုတ်ဓါတ်ဆာန်ဂကူ ဆာန်အာဲကၟာဲဂှ် ပိုဲတအ်တီကေတ်မာန်ရ။
အရာမစၟတ်သမ္တီ လ္တူညးမွဲပၠန်ဂှ် ကၠာတေံ ပ္ဍဲဂကောံမန်ပ္ဍဲကွာန်ကၟာဝက်ဂှ် ကၠောန်ပစမွဲမွဲသာ်မ္ဂး နဒဒှ်သဘာပတိမွဲဂှ် ပိုဲတအဘိက်ညးတွဵုရ၊ ဇၟာပ်ညးမဂွံလိက်ဘိက် အတိုၚ်အခိၚ်မဆိၚ်လဝ်ဂှ် ညးကၠုၚ်စဵုစိုပ်တွဵုရ၊ ဟိုတ်နူမၞိဟ်တၞဟ်တအ် ဟွံရှ်ေသှ်ေအခိၚ်တုဲ ညးဒးဂဇအ်မၚ်ညးတၞဟ်တွဵုက်ုလေဝ် မုဟွံဟီုပတိုန်ဒုဟ်မွဲလှ်ေရ၊ ဆ္ဂး ပိုဲတအ်ညှာစိုတ်လ္တူညးဗွဲမလောန်တုဲ ဗွဲကြဴလိက်ဘိက်သွက်ညးမ္ဂး ပိုဲတအ် ဒးလဇုဲလဝ်အခိၚ် ပွိုၚ်ဘာ်နာဍဳရ၊ ပ္ဍဲသ္ၚိညးပၠန်လေဝ် အခိၚ်စပုၚ်အခိၚ်တိက် အခိၚ်ဗှ်လိက်တအ်ဂှ် ညံၚ်ရဴညးမဖျေံလဝ်သ္ၚိအၚ်ကီု ကၠောန်အာအတိုၚ်အခိၚ်ဖအိုတ်။
ပ္ဍဲအရာဘာသာပၠန်လေဝ် လၟိုန်မစိုပ်တ္ၚဲသဳ ဒုၚ်ဂိုၚ်ကေတ်သဳစှ် ပ္ဍဲဇရေၚ်တၠဳပိုန်ကျာ်ဇၞော်အစာပါလိတထေရ် မနွံပိုန်ဘာတိုက်တၟိ (ဘာဓါတ်ကျာ်) ကွာန်ကၟာဝက် မဒှ်ကောန်ကၟိန်ညးလၟိုန် ဒဵုကဵုဘဝအာစိုပ် ကၞောတ်ဓဝ်ဇရာရ၊ ပ္ဍဲအရာသၠးဒြပ်ပၠန်လေဝ် ၜိုန်ရဒှ်မၞိဟ်မတိုန်ဒၟံၚ် ဘာတိုက်တၟိကီုလေဝ် ဘာဗၠိုၚ်လၟဂှ် ဒါယကာအောန်တုဲ ကြေပ်ဂြတ်ညိတုဲ ညးသၠးကဵုကၠအ်ခၜိုတ်ညးမွဲကုဘာဂှ်ရ။
ၜိုန်ရဟွံမွဲကုယဲဘဲ ၜိုန်ရဟွံပေက်တောမ်မွဲသာ်ကကီုလေဝ် ကလိဂွံအာယုက် (၉၇) သၞာံ ပ္ဍဲသက္ကရာဇ် ၁၃၆၅ သၞာံ ဂိတုပုဟ် (၃)စွေက် အခိၚ်ဗတံဒစာံနာဍဳ ကဵု ၅၅ မိနေတ်ဂှ် အာယုက်အိုတ် လမျီုတိတ်အာ ၜိုဟ်ဟ်ဩိုဟ်ဟ် ပ္ဍဲသ္ၚိညးအရာပ်ဓရိုတ်ထဝဲါ ကွာန်ကၟာဝက်ဂှ်ရ။
နိဿဲ
၂၊ ဝၚ်က္ဍိုပ်သ္ကိုပ်မတဝ်စၞေဟ်ကၠုၚ် သွက်ဗၠးၜးဂကူမန်ဂမၠိုၚ်၊ ကၞပ်(၁) တြးပ္တိတ်လဝ် ၂၀၀၇၊
0 comments:
Post a Comment
ဗှ်တုဲချူစွံလဝ်မွဲမွဲသာ်ဏး